Молитвы, читаемые над воинами, окропляемыми Святою водою перед военным походом

(Эти молитвы читаются только священнослужителем)

Молитва первая
Господи Боже наш, послушавый Моисея, простершаго к Тебе руце свои, и люди Израилевы укрепивый на Амалика и Иисусу Навину ополчившуся попустил еси солнцу стати во образ победительный. Ты и ныне услыши нас молящихтися о собравшихся всех сих, и благослови, и укрепи я: и даждь им сердце мужественно на сопротивныя враги, Ангела светла посли им, врагом же страшна и ужасна, запинающа же и погоняюща, и сердце их разслабляюща, и дерзновение в бегство претворяюща. Отыми же от рабов Твоих, на брань ныне исходящих, и от всех нас всякий глад и губительство, и избави нас от огня и меча, и нашествия врагов, и от всякаго востания противнаго. Спутешественник им буди, и подаждь им вся, яже ко спасению прошения: научи я и вразуми, спаси, защити, сохрани, очисти, и радости духовныя исполни: души и телу их Заступник и Защитник буди, и яко Благ и Милосерд и Человеколюбец прощение грехов подаждь им в день судный. Помилуй я и всех ны и благослови во вся дни живота нашего: да от Тебе помощь и заступление, и избаву приимше, славу и благодарение без всякаго препятия всегда возсылаем. Ты бо еси крепость и утверждение людем Твоим, и Тебе славу возсылаем со Единородным Твоим Сыном, и Пресвятым и Благим и Животворящим Твоим Духом, ныне и присно, и во веки веков. Аминь.

Молитва вторая
Господи Боже Сил, Боже спасения нашего, Боже, творяй чудеса един, призри в милости и щедротах на смиренныя рабы Твоя, и человеколюбие услыши и помилуй ны: се бо врази наши собрашася на ни, во еже погубити ны, и разорити святыни наша. Ты же, вся ведый, веси, яко неправедно восташа на ны, и яко не возможем мы противостати множеству их, аще не Ты явиши помощь нам. Темже грешные и недостойные в покаянии со слезами молимтися: помози нам Боже, Спасителю наш, и избави ны славы ради имене Твоего, да не когда рекут врази наши: Бог оставил я есть, и несть избавляяй и спасаяй я: но да увидят вси языцы, яко Ты Бог наш, и мы людие Твои, под державою Твоею всегда хранимы. Яви нам, Господи, милость Твою, и да приложатся к нам словеса, реченная Моисеем к людем Израильским: дерзайте, стойте и узрите спасение от Господа, Господь бо поборет по нас. Сотвори с нами знамение во благо, яко да видят ненавидящии ны и правоверную веру нашу, и посрамятся и смирятся. Ей, Господи Боже, Спасителю наш, крепосте и упование и заступление наше, не помяни беззаконий и неправд людей Твоих, и не отвратися от ны гневом Своим, но в милости и щедротах Твоих посети смиренныя рабы Твоя, ко Твоему благоутробию припадающия. Возвесели страну нашу о милости Твоей, и укрепи ю силою Твоею: возстани в помощь нашу, и разруши лукавыя советы мыслящих нам злая: суди обидящая и побори борющия ны, и обрати нечестивое дерзновение их в страх и бегство: воинству же нашему, на Тя уповающему, подаждь во мнозем дерзновении и мужестве погнати и настигнути их, и о имене Твоем победити: а имже судил еси положити на брани души своя за веру и Отечество, тем прости вся согрешения их, и в день праведнаго воздаяния Твоего воздай венцы нетления. Ты бо еси заступление, и победа, и спасение уповающим на Тя, и Тебе славу возсылаем, Отцу и Сыну и Святому Духу, ныне и присно, и во веки веков. Аминь.

Молитва от злорастворений ветров и бури морския
Господу помолимся. Господи, помилуй.
Владыко Господи Боже наш, Иже ипостасным и безначальным Твоим Словом, и животворящим, и единочестным Твоим Духом, от не сущих, во еже быти, всяческая привел еси; положивый морю предел песок, и поставивый горы и долы правилом: пядию измеривый небо, и горстию содержай землю: меры и правила, пределы и составления, и чины видимей и чувственней сей давый твари, и времен изменения, и возвраты солнечныя, и растворения стихий манием Твоим содержай неизреченно, и к безстрастному же и нерушимому окормляяй. Сам Всеблагий Царю, естественное и обычное Твое человеколюбие и благость и паки употребивый к нам, посети Твоею руку дела, и не отстави от нас милостей Твоих, и щедрот Твоих, ниже разори Завет Твой, по образу Твоему создавый неизреченно нас; Иже Единороднаго Сына Твоего избавление за ны давый, и Духа неизреченным приобщением Своего Божества преподавый, остави грехов множество, молимся, превосхождением множества щедрот Твоих. Крестом и Кровию Сына Твоего грех омывый рода нашего, возведи Твою тварь к естественному составлению, и чину, чрез естество окаянно обратившуюся, безчиния ради, чрез естество и, некрасоты беззаконнаго и злаго жительства нашего: покажи нам обычную великия сея пучины тишину, и належащую бурю, и смятение воздуха разсеки. Заповеждь ветром, временное и согласное дыхание дати: запрети волнению морскому, и чрез естество ветров движением, да станет дух бурный, и к тишине мятежная да преложатся: яко да Твоя дела, и чудеса, и паки видят сходящии на море в кораблех, и творящии делания в водах многих. Устрой е, Человеколюбче Владыко, Твоим неприкладным человеколюбием: Иже Единороднаго Твоего Сына и Господа нашего Иисуса Христа, благоволением Твоим, и содействием Святаго Твоего Духа, изволивый быти человека, и сплавати святым Твоим учеником и апостолом, и запретити бури ветров, и морским утишатися волнам повелевый. Сам и ныне всякий сопротивный ветр успи, и волны укроти, и бурю утоли, и воздвигни нарочитая и благоключимая времена и ветры, Правитель и Помощник везде быв рабом Твоим, наставляяй я во пристанище спасения: иже Твое точию ведающе имя, и не знающе разве Тебе Бога инаго, и к Твоей помощи выну призирающе, молитвами и моленми Преблагословенныя Богородицы, боговидных Ангелов, и всех святых, благоволением и благостию Единороднаго Твоего Сына, с Нимже благословен еси, и с Пресвятым, и Благим, и Животворящим Твоим Духом, ныне и присно, и во веки веков. Аминь.

Молитва, во еже устроити корабль
Господи Боже Отец наших, заповедавый Ною, рабу Твоему, устроити кивот ко спасению мира, от многих древес благоволивый ему едино древо быти и сочинитися: Сам убо Владыко всех, благоволивый бездушными древесы правити, и крепкою Твоею рукою род человеческий спасаяй, Сам и ныне Владыко, и сей корабль соблюди, и даждь ему Ангела блага, мирна; хотящыя плыти в нем сохрани. Даждь им во своя отъити здравым, молитвами Пречистыя Владычицы нашея Богородицы и Приснодевы Марии, силою Честнаго и Животворящаго Креста, честных, небесных, умных Сил безплотных, святаго славнаго Пророка, Предтечи и Крестителя Иоанна, святых славных и всехвальных апостол, и святаго (имя), и всех святых Твоих. Яко Ты еси окормляяй и освящаяй всяческая, Боже наш, и Тебе славу, и благодарение, и поклонение возсылаем, Отцу и Сыну и Святому Духу, ныне и присно, и во веки веков, аминь.
Молитва на благословение воднаго судна
Господи Иисусе Христе, Боже наш, по морю яко по суху ходивый и святыя Своя ученики от смущения и волнения того пришествием Своим свободивый: Сам и ныне, смиренно молим Тя, призри милостивно на судна сия ратная и всесильною Твоею десницею, небесным Твоим благословением благослови я, и плыти в них хотящему воинству соплавай, и благоутишны ветры им посли, и пристави им Ангела блага всесильныя Твоея крепости, еже сохранити и избавити их от всяких зельных ветров, бурей же и излишних волн и истопления, и всяких вражиих наветов и нашествий, и даждь им силу, и крепость, и мужество, и победу на враги Креста Твоего и на вся супостаты, здравых же и благополучных с победою во славу Твою мирно возврати. Ей, Господи Боже наш, удиви и ныне древния милости Твоя на нас, и Сам воеводствуй воинству сему: и Заступник и Помощник крепок буди тем, и нам на Тя уповающим и Твоея всесильныя помощи верно чающим. Ты бо еси крепость и утверждение и мир наш, и Тебе славу возсылаем со Безначальным Твоим Отцем и Пресвятым и Благим и Животворящим Твоим Духом, ныне и присно и во веки веков. Аминь. (И обычное благословение от иерея.)

Молитва на освящение знамени
Всесильный и Превечный Боже наш, Отче Господа Бога и Спаса нашего Иисуса Христа, Сам Сый всему миру Творец, и всея твари благословение, и побеждающим крепость, призри милосердым Своим оком на нас смиренных и недостойных рабов Твоих и на молитву нашу, и сию хоругвь, юже на дело брани приуготовахом, небесным Твоим благословением присети, благослови и освяти, яко да будет верному Твоему воинству на сопротивныя языки одоление и известная победа: и хранительством Твоим огражденна сущи, в бегство да претворит всех супостатов наших полки, и врагом христианскаго рода страшна всегда и ужасна да явится: верным же Твоим на Тя уповающим известное упование победы, дерзновение же и крепость да будет: молитвами же святых Твоих укреплена и Ангел Твоих ополчением огражденна сущи, да явится рабом Твоим знамение веселия и крепости, знамение победы и сердечныя крепости и мужества на супостаты. Ты бо еси Царь мира и Бог сокрушаяй брани и крепость даяй уповающим на Тя, и Тебе славу возсылаем со Единородным Твоим Сыном и с Пресвятым и Благим и Животворящим Твоим Духом, ныне и в безконечныи веки веков. Аминь.
Иерей, взем священную воду, кропит ею хоругвь, глаголя:
Благословляется и освящается знамение сие воинское в крепость и утверждение христоименитому воинству и в победу на вся враги окроплением воды сея священныя, во имя Отца и Сына и Святаго Духа. Аминь.

Молитва на благословение воинских оружий
Господи Боже наш, Боже Сил, сильный в крепости и крепкий во бранех, отроку Твоему древле Давиду предивную силу к побеждению противнаго хульника Голиафа даровавый, Ты и ныне милостивно приими смиренныя мольбы наша: на оружия сия небесное Твое благословение низпосли, и рабу Твоему сему (имя) сия носити ко укреплению и заступлению Церкве Твоея Святыя, сирых же и вдовиц, и на земли сущаго святаго достояния Твоего желающаго, силу и крепость подаждь, и сопротив всякому вражию ополчению сими грозна и страшна сотвори и победоносна всегда во славу Твою яви. Ты бо еси крепость и утверждение наше, и Тебе славу возсылаем, Отцу и Сыну и Святому Духу, ныне и присно и во веки веков. Аминь.
Иерей, взем священную воду, кропит ею оружие, глаголя:
Благословение Бога в Троице Святей славимаго: Отца и Сына и Святаго Духа, окроплением воды сея священныя да снидет и пребудет на оружие сие и на носящих я к защищению и заступлению истины Христовы. Аминь.