Икона Божией Матери «Грузинская»

(22 августа / 4 сентября)

Пред иконой Пресвятой Богородицы Грузинская молятся об избавлении от моровой язвы, эпидемии, чумы, об исцелении от глухоты и болезней ушей, слепоты или иной болезни глаз.

Молитвы ко Пресвятой Богородице пред Ее иконою «Грузинская»

Молитва первая
Приими, Всеблагомощная Пречистая Госпоже, Владычице Богородительнице, сия честныя дары от нас, недостойных рабов Твоих, к Твоему цельбоносному образу пение возсылающих со умилением, яко Тебе Самой сущей ту и послушающей моления наша, подающи с верою просящим по коемуждо прошению исполнение: скорбящим скорби облегчаеши, немощным здравие даруеши, разслабленных и недужных исцеляеши, и от бесных бесы прогоняеши, обидимыя от обид избавляеши, и насилуемых спасаеши, грешных прощаеши, прокаженных очищаеши, и малых детей милуеши, и неплодныя от неплодства разрешаеши. Еще, Госпоже Владычице, от уз и темниц свобождаеши, и всякия многоразличныя страсти исцеляеши, и очныя болезни уврачуеши, и от смертоносныя язвы избавляеши: вся бо возможна суть ходатайством Твоим к Сыну Твоему, Христу Богу нашему. О Всепетая Мати, Пречистая Богородице! Не престай молити о нас, недостойных рабех Твоих, славящих Тя и почитающих, и покланяющихся пречистому образу Твоему, и надежду имущих невозвратну и веру несумненну к Тебе, Приснодевей, Преславней и Непорочней, славящих, и чтущих, и поющих Тя во веки веков. Аминь.

Молитва вторая
К Тебе, Богоизбранная Отроковице, Пресвятая Дево Богородице, Небесе и земли Царице, припадающе, вопием: услыши молений наших глас и не отврати лица Твоего от нас, недостойных. Приими, Всеблагая, от недостойных раб Твоих, чтущих всечестное имя Твое и с верою покланяющихся Тебе пред чудотворным Твоим образом, приносимое ныне теплое моление наше, вознеси е к Престолу Сына Твоего, Христа Бога нашего, да милостив будет к неправдам нашим и не воздаст нам по делом нашим, но да пробавит щедроты Своя. Вемы, яко несмы достойни, по грехом нашим, от Него помиловани быти, аще не Ты, Владычице, умолиши Его о нас, вся бо можеши испросити у Него, матернее бо к Нему имаши дерзновение. Сего ради к Тебе, яко всемощней и всеблагой Заступнице нашей, прибегаем, усердно молящеся: испроси у рождшагося от Тебе Единороднаго Сына Божия, Христа Бога нашего, всем нам в святоотечестей Православней вере твердое до конца дней наших пребывание и во всех заповедех Господних неуклонное хождение, да, прочее время живота нашего поживше во всяком благочестии и чистоте, сподобимся мирныя христианския кончины и добраго ответа на страшнем Суде Сына Твоего и Бога нашего и тако достигнем, под кровом Твоея помощи, живота вечнаго во Царствии Отца светов, Емуже купно со Единородным Его Сыном и Святым Духом, подобает слава, честь и поклонение, ныне, и присно, и во веки веков. Аминь.

Молитва третья
О Пресвятая Владычице Богородице! Приими недостойную молитву нашу, и сохрани нас от навета злых человек и от внезапныя смерти, и даруй нам прежде конца покаяние. На моление наше умилосердися, и радость вместо печали даруй. И избави нас, Госпоже, от всякия беды и напасти, скорби и болезни и всякаго зла. И сподоби ны, грешныя рабы Твоя, одесную стати во втором пришествии Сына Твоего, Христа Бога нашего, и наследники быти Царствия Небеснаго, и жизни вечныя со всеми святыми в бесконечныя веки веков. Аминь.

Молитва четвертая, чтомая в Московской Грузинской, на Воронцовом поле, церкви
О Чудная и Пречудная Царице Богородице, Мати Христа Бога нашего! Услышы ны грешныя и недостойныя рабы Твоя, в час сей припадающия и прилежно вопиющия: от бед избави нас, Владычице, и заступи, не презри слез и воздыхания нашего, и избави нас от всякия скорби и напасти, от злаго же и лютаго оклеветания; разве бо Тебе Предстательницы и Ходатаицы теплыя к Сыну Твоему, Христу Богу нашему, не имамы. Емуже молися, да спасет Тебе ради души наша, ныне и присно и во веки веков. Аминь.

Молитва пятая
О Пресвятая Дево, Мати Христа Бога нашего, Царице Небесе и земли! Вонми многоболезненному воздыханию душ наших, призри с высоты святыя Твоея на нас, с верою и любовию покланяющихся пречистому и чудотворному образу Твоему. Се бо грехми погружаемии и скорбьми обуреваемии, взирающе на Твой образ, яко живей Тебе сущей с нами, приносим смиренная моления наша. Не имамы бо иныя помощи, ни инаго предстательства, ни утешения, токмо Тебе, о Мати всех скорбящих и обремененных! Помози нам немощным, утоли скорби наша, настави на путь правый нас заблуждающих, уврачуй болезненная сердца наша и спаси безнадежных, даруй нам прочее время жития нашего в мире и покаянии проводити, подаждь христианскую кончину, и на страшнем суде Сына Твоего явися нам милосердая Предстательница, да всегда поем, величаем и славим Тя, яко Благую Заступницу рода христианскаго, со всеми угодившему Богу, во веки веков. Аминь.

Молитва шестая, чтомая в Николаевской Золотокрестенской церкви града Вологды
О Пренебесная Царице, Богородице Марие, Божественнаго Света Светоприемнице, Божия Слова Вместилище, пророческое зерцало, апостольская проповедь, мучеником страдания венче, святителем похвало, преподобным светлое песнопение и помощнице, и всем святым ликование, Вселенския Церкве чудная похвало, царем православным державо непобедимая, архиереем светлый венче, и всего православнаго христианства божественный покрове и помощнице, от всяческих зол избавление, грехов разрешение, к вечней жизни наставница и пред Христом о нас Ходатаице! Даруй, о Владычице Богомати, заступление и помощь, Твоя неизреченная и дивныя чудеса почитающим, и честныя Твоея иконы знамения, на спасение и заступление последним родом являемая. Алчущая сердца наша напитай небесною пищею, и веселия духовнаго исполни, и мыслем нашим смирение даруй, страх Твой в сердца наша всади, и любовь нелицемерну утверди в душах наших, и на всяк путь Божественных заповедей настави, во еже ходити нам по заповедем Сына Твоего, Господа нашего Иисуса Христа, Емуже слава подобает, со Отцем и Святым Духом, ныне и присно и во веки веков. Аминь.

Тропарь, глас 4
Днесь светло красуется обитель Красногорская, и с нею ликовствует Раифская пустыня, яко зарю солнечную, от востока возсиявшую, восприимши, Владычице, чудотворную Твою икону, еюже разгоняеши мглу искушений и бед от вопиющих верно: избави обитель нашу и вся страны христианския от всех навет вражиих и спаси души наша, яко Милосердная Заступница рода христианскаго.

Ин тропарь, глас 5
Веселятся православнии народи, видяще, Владычице Дево Богородице, Твою пречудную и чудотворную икону, и приемлют врачевство душевное и телесное Твоею милостию всегда. Темже и мы, покланяющеся оней, усердно Тебе вопием: помилуй, Благая Мати, смиренныя рабы Твоя и избави нас от всякаго зла и навета вражия, молящи Сына Твоего Господа Иисуса, да, спасшеся зде, Небесное жительство получим человеколюбием и благодатию Его.

Кондак, глас 8
Тебе, Избранней от всех родов, Божией Матери, благодарственная пения приносим, пришествием честныя Твоея иконы, раби Твои, Богородице, озаряеми, но, яко имущая державу непобедимую, от всяких нас бед свободи, да зовем Ти: радуйся, Невесто Неневестная.

Ин кондак, глас 6
Аще попущением Божественным от рук неверных честная Твоя, Владычице, икона поруганию подвержеся и копием варвар прободена бысть, обаче во стране нашей Православней любочестно всеми прославляется и благоговейно почитается, сего ради Тобою является слепым зрение, глухим слышание, немым глаголание, хромым хождение, разслабленным укрепление, скорбным утешение и отраду. Сих ради молим Тя, Милосердная Мати, до конца пробави милости Твоя на нас, яко Благая.

Величание
Величаем Тя, Пресвятая Дево, Мати Христа Бога нашего, и чтим образ Твой святый, от негоже источаеши исцеления всем, с верою к Тебе притекающим.